MUSEO DO PRADO

Unha das maiores e mellores pinacotecas do mundo está hoxe de días, nada máis e nada menos que 200 anos!!

 

E no caso de non ter posibilidade de ir velo en vivo e en directo, a súa páxina web permítenos desfrutar con detalle das obras da súa colección ao tempo que obtemos unha breve explicación.
Facédelle unha visita, física ou virtual, seguro que non vos arrepentides.

A MURALLA VERDE

Se exceptuamos á muralla popularizada polos cantantes Ana Belén e Victor Manuel que ten un carácter reversible e pode unir ou separar dependendo de quen veña petar á porta, o resto das murallas e dos muros teñen sempre unha función defensiva e de resistencia. Quizá nos soen, e moito, o muro de Berlín ou ese outro entre EEUU e México que algún dirixente pretende construír. Pero hoxe ímonos fixar nun que ten un matiz positivo.
A muralla verde é o intento que, dende o ano 2007 está a facer o continente africano para evitar a expansión do deserto nunha actuación que se extende dende Senegal ao oeste ata Djibuti situado no chamado corno de áfrica.
Deste xeito, preténdese concienciar á poboación sobre a importancia de frear o avance do deserto derivado da sobreexplotación dos recursos.

¿Conoces la gran Muralla Verde de Senegal?

ODS

E que son os ODS que nomeei na entrada anterior? Pois non sei se te terás fixado que na televisión, ás veces, aparece xente cun pin multicolor en forma de anel; isto simboliza os ODS.
Quizá non recordes os ODM (É normal; daquela quizá nin sequera naceras).

Os obxectivos do milenio, que así se chamaban, pretendían actuar sobre a pobreza, a educación, a igualdade, a saúde e o medio para conseguir unha mellora sobre todo nos países de economía en vías de desenvolvemento.

O ano 2015 é cando remataba o prazo autoimposto polo PNUD  (Programa das Nacións unida para o desenvolvemento). Os seus resultados podémolos consultar na súa páxina web.

Os ODS (Obxectivos para o desenvolvemento sostible) supoñen, na realidade, unha continuación e unha ampliación daqueles obxectivos ata o ano 2030.

Parece ser que por fin nos demos conta de que nun mundo cada vez máis globalizado as medidas a tomar deben implicar a todos e cada un dos países (independentemente do seu nivel de desenvolvemento) e a todos e cada un de nós. A Guía dos preguiceiros para salvar o mundo e as 170 accións diarias para salvar o mundo danos consellos sobre que podemos facer para colaborar neste proxecto.

Haberá que poñerse mans a obra, non? 

AQUAMETRAGEM

É o título da curtametraxe portuguêsa de Marina Lobo que ven de gañar o festival ODS de filmes de acción organizado pola ONU na categoría "Protexer o noso planeta". A curta, en apenas seis minutos, pretende sensibilizar sobre a correcta utilización dos limitados recursos hídricos.

ARAL

Aí está. Sinalado cun punteiro vermello o que, no seu día foi a cuarta masa de auga interior no planeta terra. E falamos en pasado porque dende os anos 60 do século anterior esta masa de auga non fixo máis que minguar. Hoxe, a pesar dunha pequena e tímida recuperación na súa parte norte, o mar está practicamente a desaparecer. As implicacións ambientais, económicas e sociais son fáciles de imaxinar.

Un mar que muere de sed

Cóntanolo ben o noticiario e, dun xeito máis poético quizá, o documental titulado "Aral, el mar perdido" de Isabel Coixet.

CANDO UN É VÍCTIMA DE SI MESMO

Stalin é unha desas personaxes históricas que orixina en torno a ela intensos debates por parte de defensores e de detractores. Independentemente do papel que xogara na liberación de Europa do nazismo o certo é que dirixiu a URSS con man de ferro (deberiamos dicir máis ben con man de aceiro, stal en ruso, que de aí é de donde vén o seu sobrenome) dende o ano 1922 ata a súa morte no 1953. O réxime de terror que implantou debeu ser de tal envergadura que cando sufriu un infarto ninguén foi quen de botarlle a man por medo (algo de razón deben ter os seus detractores)

Isto aconteceu fai hoxe 66 anos e é o que nos conta, xunto ao enfrontamento pola súa sucesión, a película, en tono de comedia, así titulada: "A morte de Stalin". 

Se tedes ocasión botádelle un ollo cando poidades así como ao cómic que tamén nolo conta.

ESTACIÓN METEOROLÓXICA VERSUS ESTACIÓN ASTRONÓMICA

Unha vez escoiteille dicir a Santiago Pemán nunha entrevista na radio (o que foi home do tempo na galega durante moito tempo) que en Galicia tiñamos tres estacións: o verán, o inverno e a do tren.

Pois resulta que non; hai bastantes máis aínda que só sexa polo feito de que non coinciden exactamente as astronómicas coas meteorolóxicas. Estas últimas comezan sempre co inicio do mes: o 1 de marzo, o 1 de xuño, o 1 de setembro e o 1 de decembro. Estatísticamente é así máis fácil comparar datos xa que , as estacións, sempre duran o mesmo (excepto en ano bisesto, claro) e non dependen da elipse que traza a órbita da terra no seu movemento de traslación que pode modificar a duración da estación ata en catro días.

Por se alguén non se enterou, entramos xa na primavera meteorolóxica.

FERNANDO VII

Cando escoitei hai pouco a un político referirse a outro político como felón (sen comentarios) acordeime, como non, de Fernando VII, ese rei que pasou de alcumarse ao principio como o desexado para rematar sendo coñecido, xustamente, como o rei felón.
Tirano, hipócrita, cruel, despiadado, vengativo son solo algúns dos adxectivos que se lle adican. E algo de razón debe haber cando é unha figura vilipendiada practicamente por calquera persoa estudiosa da historia (co difícil que resulta poñer de acordo á xente). E a verdade é que á vista das intrigas que protagonizou antes de reinar e as actuacións ao longo dos anos do seu reinado, a adxectivación quédase corta.
Mirade, escoitade e valorade pois.